Logo XacobeoLogo Marca Galicia
Las Bodeguillas de Santiago de Compostela

Temas

Revera Vinum: o viño galego encóntrase de novo o 27 e 28 de marzo no San Francisco Hotel Monumento

14/02/2023 · Las Bodeguillas

Despois da boa acollida da primera edición de Revera Vinum, o San Francisco Hotel Monumento acollerá o II Encontro do Viño Galego os vindeiros luns 27 e martes 28 de marzo. O evento contará coa participación de prestixiosos sumilleres, enólogos e críticos especializados.

O principal obxectivo do II Encontro do Viño Galego “Revera Vinum” non é outro que a difusión e a posta en valor da diversidade e calidade dos viños galegos, tanto entre os profesionais e os veciños composteláns, coma os turistas que visiten se acheguen á cidade. Para ofrecer unha pequena ollada de todo o que ofrece o sector vitivinícola galego, contarase cun Túnel do Viño, así como unha área expositiva na que se mostrarán as Denominación de Orixe e as Indicacións Xeográficas Protexidas galegas.

Os dous días da exhibición terán tres eixes centrais ineludibles: talleres e catas con algúns dos máis prestixiosos profesionais, unha área expositiva con máis de 25 stands e un Túnel do Viño con máis de 300 referencias e un foro con varias mesas de debate que falarán sobre o futuro do viño galego.

Actividades do luns 27 de marzo

No comezo da segunda edición do Revera Vinum, no día 27, contarase coa intervención de especialistas como Luis Paadín con “Castes galegas vs castes internacionais” e Martiño Santos Canosa con “Marcas novas en zonas vellas”; coa “Cata de cartas de viños dos séculos XVIII-XIX”, da man de Alejandro Paadín; a entrega das Distincións Gallaecia de Augardentes e Licores de Galicia do 2023; unha mesa de debate conformada por Fernando Mora, Pepe Raventós, Antonio Portela e Martiño Santos Canosa; e a actividade gratuíta “A nación dos mil viños”.

Actividades do martes 28 de marzo

A mañá do segundo e último día do Revera Vinum comezará coa intervención da enóloga Cecilia Fernández con “Castes tintas en crianza”. A isto seguiralle un taller de cata de carne madurada en vacún con tintos da D.O Ribeira Sacra, con José Portas e Guillermo Hermo. Máis tarde, poderase desfrutar da presentación e cata de todas as novidades da Adega Ponte da Boga xunto con Dominique Roujou. Xa durante a tarde, Iria Otero, Juan Chamorro, Pablo Vidal, José Luís Bouzón e Andrea Obenza dirixirán a cata da añada histórica 2015. Para poñerlle o broche de ouro, contarase con Miguel Gómez no espazo de augardentes e licores de Galicia. 

Así mesmo, ámbolos dous días contarase coa entrada de balde, de 11.00 a 20.30 horas, no Túnel do Viño de Galicia.

A actividade, cuxo programa completo podes consultar aquí, está promovida pola Asociación Hostelería Compostela e organizado por Escenoset, conta co patrocinio de Turismo de Galicia, o Concello de Santiago e a colaboración de diversas empresas. Para máis información sobre as ponencias, prazas e inscricións, podedes consultar a páxina de Revera Vinum.

¡Compártelo!