Este xoves 13 de febreiro comeza o XVI Santiago(e´)Tapas, o concurso gastronómico organizado por Turismo de Santiago no que participan 42 locais da cidade compostelá. Como en cada edición, aqueles que completen as rutas do certame poderán optar a distintos premios, os cales se poderán recoller ata o 10 de marzo na Oficina de Turismo de Santiago. Este ano, xunto con outras propostas decidiuse apostar por tapas doces, sen glute ou vexetarianas.
Para participar, é necesario contar co Tapasporte, un documento en formato libro que se poderá recoller dende o inicio do evento na Oficina de Turismo de Santiago e en todos os locais participantes.
Os asistentes poderán percorrer calquera das 7 rutas dispoñibles, degustar as tapas, votar a través dos códigos QR entregados nos distintos establecementos e solicitar así o selo correspondente para o seu Tapasporte.
Un ano máis, as Bodeguillas participan nesta nova edición con dúas propostas que reflicten a esencia da gastronomía galega:
- Na Bodeguilla de Santa Marta, presentamos “Sabores da Terra”, unha tapa creativa que fusiona ingredientes autóctonos cun toque innovador.
- Na Bodeguilla de San Lázaro, ofrecemos “Cocido Galego”, unha tapa tradicional da cociña galega elaborada con produtos de alta calidade.
Aqueles que completen as rutas poderán recibir dende produtos galegos a botellas de viño, packs de cervexa, abonos para o Obradoiro CAB e a SD Compostela, balóns vintage do Compostela, libretas, paraugas e outros obsequios.
Para os turistas que só pasen uns días na cidade, o evento ofrece a opción Tapasporte Express, que permite obter un agasallo cun selo de cada unha das 7 rutas de (e´)Tapas.
Ademais, haberá un premio especial sorpresa para aqueles que consigan os selos dos 5 establecementos distinguidos co selo de Calidade Turística SICTED, entre os que se atopan a Bodeguilla de San Lázaro e a Bodeguilla de Santa Marta.
Esperámoste nas Bodeguillas para desfrutar desta gran cita gastronómica!