Con máis de 70.000 Compostelas e preto de 100.000 peregrinos no que vai de ano, non hai lugar a dúbidas de que realizar algunha das etapas do Camiño de Santiago está a ser un dos plans predilectos dos turistas nacionais e internacionais neste ano. E a nós, non se nos ocurriu nada mellor para celebrar estas boas cifras que indagando sobre datos curiosos do Camiño. Aquí vos presentamos algúns!
- Quen foi o primeiro peregrino? O denominado primeiro peregrino non foi outro que o rey asturiano Alfonso II O Casto. Durante o seu reinado, un ermitaño descubriu a tumba do Apóstolo Santiago, polo que o rei viaxou até a capital galega para verificar os restos. O percorrido realizado polo monarca é o actual Camiño Primitivo.
- Tantos camiños como peregrinos. Dende o descubrimento dos restos do Apóstolo Santiago, milleiros de devotos decidiron achegarse á cidade. O primeiro camiño, o Primitivo, partiu de Oviedo, pero os fieis partiron de sitios moi diversos, posto que non había ningún sendeiro correcto marcado. Sen embargo, no ano 1993, a UNESCO recoñeceu a peregrinaxe do Camiño Francés, por ser o máis transitado, como ben do Patrimonio Mundial. No 2015, completouse o ben do “Camiño de Santiago de Compostela” con outras catro rutas baixo a denominación de Camiños do Norte (Camiño Costeiro, Camiño Primitivo, Camiño Lebaniego e Camiño Interior Vasco-Rioxano).
- A fin do Camiño. O impoñente Obradoiro, cunhas vistas privilexiadas da Catedral, marcan a fin do Camiño, mais moitos peregrinos continúan a súa viaxe até a fin do mundo, Fisterra. Este último tramo, non tan popular, adóitase relacionar coas peregrinacións paganas, nas que se seguía o sol até o seu declive.
- Queimar o calzado co que se fixo o Camiño. Aínda que lle chega a dar un aspecto un tanto descoidado á zona, os peregrinos que deciden emprender a aventura de facer o camiño até Fisterra, libéranse de todo pecado desfacéndose do calzado que os acompañou durante o traxecto. Unha vez chegado á fin do mundo, os camiñantes queiman os seus zapatos ou algunha prenda de roupa e danse un baño na costa como símbolo de purificación do espírito para os crentes e tamén do corpo.
- A orixe das frechas amarelas. Xunto coa vieira, a frecha amarela é un dos símbolos distintivos do Camiño de Santiago. O indicador adquiriuse no 1984, cando o sacerdote do Cebreiro, Elías Valiña, comezou a sinalizar a ruta con frechas desta cor en calzadas, árbores ou valados. A este, seguíronlle outros moitos voluntarios, destacando a Asociación dos Amigos do Camiño de Navarra.
Aínda que estamos habituados a que nos falen do Camiño de Santiago e semella que non é nada novo para nós, con investigar un pouco e miralo cunha ollada renovada, sempre descubrimos datos moi interesantes. E ti, cantas destas curiosidades descoñecías?