As rúas de Compostela xa arrecenden a festa. Do 18 ao 31 de xullo, a capital galega énchese de vida coas Festas do Apóstolo, unha cita obrigada para a veciñanza e visitantes que cada ano se achegan a desfrutar do Día de Galicia. Este ano, como en anteriores edicións, o programa vén cargado de actividades para todos os gustos, dende concertos e danza ata cinema ao aire libre.
A festa comezará o venres 18 de xullo cun espectáculo internacional de danza contemporánea na Praza de San Martiño Pinario, con artistas de Galicia, Andalucía, Estremadura e Taiwán. Esa mesma noite, haberá concertos na Quintana e na Alameda, de Biznaga e Grupo Alcázar, e tamén se celebrará o pregón oficial desde o balcón do Pazo de Raxoi, a cargo da xogadora de baloncesto Blanca Millán.
O fin de semana continuará con moita actividade. O sábado 19 destaca pola presenza de música infantil, mostras de danza urbana, xornadas de folclore galego e a XII Foliada no Castiñeiriño. O domingo 20, celebrarase o Día do Traxe, data na que se presumirá de vestimenta tradicional nun desfile que percorrerá a cidade desde as sete portas históricas ata a praza do Obradoiro.
Os días seguintes seguen ofrecendo espectáculos de primeiro nivel. Deste xeito, o 21 de xullo, a cantante SÉS actuará na Quintana. O martes 22 de xullo, terá lugar a Festa Pícara no parque Eugenio Granell, con actividades para crianzas, obradoiros, música, cabezudos e unha homenaxe ao Xabarín Club. O mércores, no estadio Verónica Boquete, moi preto da nosa Bodeguilla de San Lázaro, disputarase un partido solidario entre a SD Compostela e o Deportivo da Coruña. Na mesma noite, a Real Filharmonía de Galicia ofrecerá un concerto na Quintana.
O xoves 24 de xullo, comezará cun desfile de xigantes e cabezudos pola cidade, concertos e rematará cun espectáculo pirotécnico en varios puntos da cidade: na Alameda, na Cidade da Cultura e en Carlomagno.
O 25 de xullo, para celebrar o día grande de Galicia, a cidade vestirase de gala e a festa dará comezo desde ben cedo, cunha comparsa de cabezudos que percorrerán o casco histórico, música polas rúas e grandes concertos pola noite. Na Quintana actuará Maika Makovski e na Alameda, a orquestra Galilea.
Xa o sábado 26 de xullo comezará con alboradas desde Santa Marta e rematará con concertos como o de Lura. O domingo 27, celebrarase o TradFest, cunha feira de artesanía, música polas prazas e actuacións de grupos como Baiuca, Faltriqueira ou Cocanha.
Os últimos días, do 28 ao 31, haberá concertos do ciclo Peregrinos Musicais, cine ao aire libre e actuacións como as de Samesugas, MJ Pérez, Sheila Patricia ou a proposta “De paseo con Nino Bravo e Serafín Zubiri” coa Banda Municipal. E para pechar as festas, o xoves 31, poderemos deleitarnos cunha nova sesión de pirotecnia, desta volta dende o punto único da Alameda, e música con Orquestra Bravú Xangai.
E entre tantas propostas, chega o momento de parar, repoñer forzas e seguir gozando. Por iso, nas Bodeguillas temos as portas abertas con pratos cheos de sabor, ingredientes de primera calidade e viños para brindar. Se estás polo barrio de Santa Marta, despois dun paseo pola Alameda, xa sabes onde facernos visita. E se os teus pasos te levan ao estadio, ao Auditorio ou aos concertos do Parque de Galeras, San Lázaro é a túa parada obrigada.