Chega o verán a Santiago de Compostela e, con el, unha das noites máis máxicas do ano: a noite de San Xoán. Como cada 23 de xuño, dende a Praza de Mazarelos, a cidade énchese de lume, música, tradicións ancestrais e un espírito comunitario que nos achega á nosa cultura.
O San Xoán é moito máis ca unha simple noite de fogueiras. É unha homenaxe ao solsticio de verán, ao poder do lume como elemento purificador e á forza das herbas que recollidas esa noite adquiren propiedades máxicas. Durante toda a xornada, os barrios da cidade vanse preparando para a festa, que terá o seu epicentro na Praza de Mazarelos. Esta localización da zona vella acolle un programa pensado para todos os públicos e convida a participar activamente na festa. Desde primeiras horas da tarde, a música tradicional percorrerá cada recuncho do casco histórico co pasarrúas a cargo da Asociación Cultural Argalleiros, e a praza convertirase nun espazo de aprendizaxe e entretemento con obradoiros de baile, pandeiretas e xogos musicais.
Ademais, para quen queira mergullarse nas raíces da festa, previa reserva, organizan percorridos botánicos polas beiras do río Sar. Neles recólleranse as herbas máxicas do San Xoán, todas aquelas que, somerxidas en auga durante a noite, usaranse ao amencer para lavar a cara e afastar os males. Xa a partir das 21:30, a música colle forza coa actuación de Cantigas e Agarimos, que dará paso a unha foliada aberta onde quen queira poderá participar bailando.
Santiago é fermoso durante todo o ano, pero nas noites coma esta, cando as rúas se iluminan coas lapas das cacharelas e o arrecendo a sardiña impregna o aire, a cidade latexa con forza. E nós agardámosvos para compartilo á nosa maneira, con boa mesa e esa calor humana que tanto nos caracteriza.