O cheiro das castaña inunda as rúas da zona vella de Santiago e as follas en tonos marrón e ocres enchen o chan da Alameda. O outono chegou e, con el, algúns plans culturais que non te podes perder na capital galega.
Luz Poética
Dende este luns 17 e ao longo de toda a semana, Compostela acollerá o I Festival de Poesía Nova, inspirada na figura da poeta compostelá Luz Fandiño e na súa maneira de entender a cultura e a poesía.
O encontro para mozos celebrarase en diferentes espazos da cidade. Entre eles podemos citar a Igrexa da Universidade de Santiago de Compostela, o Centro Sociocultural Xove da Almáciga ou o Teatro Principal, entre outros.
Do luns ao sábado, os composteláns deleitaranse cos poetas da escena galega actual. Así mesmo, o evento culminará o sábado 22, ca Gran Final Poetry Slam estatal 2022 no Teatro Principal.
Santiago (é)Tapas
O xa tradicional evento gastronómico Santiago(é)Tapas está a piques de arrancar a súa décimo cuarta edición. Dende o xoves 27 de outubro e até o vindeiro domingo 13 de novembro os visitantes da capital galega poderán percorrer as súas rúas dunha maneira diferente á convencional: a través de diferentes rutas conformadas polas elaboracións culinarias dos restaurantes e bares participantes neste XIV Concurso de Tapas de Santiago de Compostela.
Dende propostas máis tradicionais até as máis creativas e rompedoras, os usuarios poderán probalas a un prezo único e presumir de peregrinación. As (e)tapas contan cun orixinal “Tapasporte” que se poderá encher de selos, ao estilo do Camiño de Santiago. Logo, os particulares peregrinos poderán votar as súas creación preferidas.
E, como toda boa tapa vai acompañada da súa correspondente bebida, nas mesmas datas e no marco da mesma celebración, terá lugar o III Santiago(é)Cóctel.
II Compostela Photo
A iniciativa fotográfica de Santiago Centro arrancou no verán pero estenderase até mediados de novembro. Ca fin de actuar como impulsor para as rúas e comercios do Ensanche, Compostela Photo engalana os portóns de garaxes con fotografías en gran formato.
Unha vez máis, a exhibición está centrada no Xacobeo, o Camiño de Santiago e os valores que o rodean. E, esta temática, observarémola a través da particular visión dun grupo seleccionado de 15 artistas visuais e fotógrafos afeccionados.
Así mesmo, o II Compostela Photo organiza actividades paralelas á mostra e, a vindeira fin de semana será a quenda dun percorrido pola cidade cunha ollada fotográfica.
A estas propostas, súmanse outras moitas que conforman unha programación cultural inmensa para desfrutar Santiago de Compostela a través dos diferentes sentidos.