Se vas a estar por Santiago de Compostela nestas vindeiras semanas, non te podes perder algúns dos eventos culturais máis soados do outono na cidade: Cineuropa, o Outono Códax Festival o Mercado da Arte.
Cineuropa chega á súa 40ª edición, que se celebrará do 6 ao 22 de novembro, co mesmo obxectivo de achegar propostas cinematográficas, sensibilidades e formas de narrar diferentes. Sen esquecerse dos grandes premios de Cannes, Berlín, Venecia ou San Sebastián, esta cita fai fincapé no pequeno cine alternativo, reunindo a grandes nomes con novos realizadores. Deste xeito, a programación inclúe filmes como Fjord, Minotauro, Fatherland ou All of a sudden, así como Everybody Digs Bill Evans ou Rose. Ademais, Cineuropa estreará en Galicia os novos traballos de Eloy Domínguez, Tralovento, Eloy Enciso, Todo es cárcel, e Sebastián Uría, Adiós, Ríos, así como a primeira obra de Ledia Sola, As augas. Por outra banda, Biografía de Jorge Luis Borges, de Mariano Llinás, e o documental Diario de un infiltrado –con imaxes inéditas dos campos de prisioneiros da ditadura de Pinochet- figuran entre as propostas destacados da edición. Felipe Lage, Laia Marull, Robert Guédiguian e Moisés González son as figuras que recollerán os Premios Cineuropa.
Dende o 7 de novembro e ao longo de todo o mes, desfrutarase nas salas Capitol e Riquela da XVI edición de Outono Códax Festival. Trátase dun encontro que achega a Galicia nomes lexendarios das músicas de raíz afroamericana pero tamén propostas de actualidade, encabezados polo soul, o garage ou o rock. Esta edición contará con artistas como Barrence Whitfield & MFC Chicken, The Sadies, The Fuzztones, DeRobert & The Half-Truths, Kitty, Daisy & Lewis, Tiwayo, MRCY, HENGE, Oh! Gunquit, Howlin’ Jaws, Terra Lightfoot ou Skanderani.
O Mercado da Arte é unha proposta para os amantes da arte e a creatividade. Celebrarase o sábado 14 de novembro, de 11:00 a 20:30 horas, nas instalacións de Área Central. O encontro, organizado por No todo el pescado está vendido, reunirá a máis de 80 artistas e creadores da comunidade e tamén doutros puntos do país, que presentarán traballos orixinais e feitos de maneira artesá. O público poderá adquirir pezas únicas de ilustración, pintura, cerámica, ourivaría e téxtil. Ademais, o evento contará coa actuación musical Rosalía Cantareira por Jara Ortiz ás 12:30 horas e, xa pola tarde, ás 18:00 horas, con Paco Nogueiras.
E, por suposto, non esquezas facer a parada rigorosa na Bodeguilla de Santa Marta ou na Bodeguilla de San Lázaro para poñerlle aínda mellor sabor de boca á cultura.