A escasos días de rematar o 2023, nas Bodeguillas xa estamos a pensar en todo o que nos deparará o vindeiro ano. Aínda que pola nosa parte prometemos bos momentos en San Lázaro e Santa Marta en boa compañía e con moito sabor, a cidade de Santiago de Compostela non se queda atrás con todo o que xa nos está a propoñer para os primeiros días do 2024.
X Edición da Carreira San Silvestre e festa de Fin de Ano
Sen ir máis lonxe, a cidade propónnos despedir -e recibir- o ano aos pés da Catedral. Durante a tarde do domingo 31, celebrarase a décima edición da Carreira San Silvestre de Santiago de Compostela. Esta comezará na Avenida Xoan XXIII e concluirá coa entrega de premios na Praza do Obradoiro.
Xa durante a noite, aqueles que se animen a achegarse ao Obradoiro a escoitar as badaladas de medianoite da Berenguela poderán desfrutar de música, baile e festa a rachar. E, ademais, recibirán cotillón e uvas de balde.
Un paseo polas estrelas
Xa é habitual, coa chegada destas datas, a iluminación da Alameda dun xeito moi especial. Ata o 7 de xaneiro, a partir das 18.00 horas, as personaxes ilustres que nos podemos atopar neste enclave, estarán iluminadas con luz e cor.
E, aínda que toda a cidade está engalanada, non podemos esquecernos de visitar a Praza da Quintana para descubrir o seu lenzo de estrelas.
Moitos obradoiros para os máis pequenos
Durante estas datas, os pequenos e pequenas da casa poderán desfrutar dun sinfín de obradoiros gratuítos. Entre eles, pódense atopar obradoiros de resina, de sombreiros divertidos, de luces de Nadal, serigrafía nadaleña, de candeas para alumar a noite de Reis ou de Cantos de Nadal.
Cabalgata e recepción dos Reis Magos
Como non podía ser doutro xeito, os Reis Magos de Oriente percorrerán as rúas de Compostela até chegar á praza do Obradoiro. O encontro terá lugar a partir das 17.00 horas, con saída da Avenida de Ferrol. Logo do traxecto, arredor das 19.00 horas, as Súas Maxestades recibirán a todos os nenos e nenas que queiran achegarse no Pazo de Raxoi.
Se a maxia do Nadal fose pouca, nos últimos días, do 3 ao 7 de xaneiro, no Multiusos Fontes do Sar, o Circo do Sol deleitará aos asistentes cun mundo oculto e cheo de contrastes co seu espectáculo OVO.
Se quedaches con ganas de saber máis de todas as actividades que a cidade de Santiago ofrece neste Nadal, preme aquí para consultalas todas.