Son centos de propostas as que nos brinda Santiago de Compostela. Coa chegada de novembro e o seu tempo, os plans seguen a rodar e a choiva non vai impedir que desfrutemos da cidade dende os seus diferentes prismas. Se non sabes que facer nestas semanas de outono, colle boli e lapis porque aquí van cinco datas que non te deberías perder.
Outono Códax Festival 2023
Dende comezos de mes e até o vindeiro sábado 25 de novembro, Santiago está celebrando o Outono Códax Festival, o festival de música negra que está a reunir a representantes do soul, jazz, swing ou blues como Sunny War, Pokey Lafarge, Sarah Shook & The Disarmers, Dylan Leblanc, Kassi Valazza, Nick Waterhouse, Nikki Hill ou The Beat from Palookaville, entre outros.
Podes consultar a programación completa aquí.
Festival Cineuropa 2023
O cine europeo toma protagonismo en Santiago de Compostela con proxeccións, charlas e a oportunidade de interactuar con cineastas destacados. O festival Cineuropa arrancou o pasado xoves 9 de novembro e estenderase até o sábado 25.
O certame está a presentar 115 filmes e numerosas actividades paralelas que van dende concertos e proxeccións especiais até mesas redondas e obradoiros arredor do cinema. O Teatro Principal, o Salón Teatro, o Auditorio de Galicia, NUMAX, Multicines Compostela, o CGAC e a Zona C son os espazos nos que se están a proxectar e realizar as actividades desta edición.
Consulta aquí a programación completa.
Museo en familia
Ata o mes de decembro, o Museo das Peregrinacións e de Santiago está a celebrar a sexta edición do programa “Museo en Familia”. Con esta iniciativa e cunha programación variada, pertende ser un espazo de encontro cultural destinado a todos os públicos, con especial atención aos nenos e nenas do seu entorno familiar.
A proposta en detalle, aquí.
Botamos un baile?
A Biblioteca de Galicia, na Cidade da Cultura, vén de estrear a exposición “Botamos un baile? Un século de orquestras de verbena en Galicia”. A mostra conta con programas de festas, fotografías, discos de vinilo, casetes, CDs e sobre todo, carteis, que pretenden achegar esta parte dos fondos da institución, pouco ou nada tratados academicamente, aínda que contan cunha fonda pegada na sociedade galega.
Consulta aquí os detalles da mostra.
Luces de Nadal
Para despedir o mes de novembro e recibir unha das tempadas máis agardadas do ano, o 1 de decembro a cidade acenderá as súas luces. Aínda que non se coñecen todos os datos de como discorrerá este Nadal en Compostela, promete ser tan especial e máxica como en pasadas edicións.