Xa temos presumido de Compostela en numerosas ocasións pero, co gallo do Día Internacional dos Museos o pasado 18 de maio, é momento de facelo unha vez máis. Este evento, celebrado dende 1977 e coordinado polo Consello Internacional de Museos, tenta concienciar sobre a importancia destes medios para o intercambio cultural, enriquecimiento das culturas, así como para o desenvolvemento da comprensión mutua, da colaboración e da paz entre os pobos. E, que mellor maneira de poñer no foco estes centros culturais, históricos e artísticos que comezando por coñecer aquilo que temos na casa?
Centro Gallego de Arte Contemporáneo (CGAC)
O CGAC foi creado en 1993 e conta con programación estable dende 1995. O espazo, deseñado polo arquitecto portugués Álvaro Siza, está dedicado á arte contemporánea en todas as súas formas. O museo ofrece exposicións temporais que destacan tanto artistas galegos como internacionais. Actualmente conta coas mostras Lamazares. Inda é día, do artista lalinense Antón Lamazares, e a exhibición escultórica Salto cuántico, de Diego Vites e Violeta en colaboración co colectivo Nova Escultura Galega.
Non hai dúbida que as súas instalacións e a integración co entorno histórico, no límite da cidade monumental, convírtena nun lugar fascinante para os amantes da arte. O CGAC atópase na rúa de Ramón del Valle-Inclán, 5, de 11.00 a 20.00 horas, salvo os luns que estará pechado. A súa entrada é de balde e ten visitas guiadas ás exposicións todos os domingos.
Museo Centro Gaiás
Na Cidade da Cultura, e de 10.00 a 20.00 horas, todos os días da semana e de acceso gratuíto, atópase o Museo Centro Gaiás. Este centro ofrece unha superficie expositiva de 6.600 metros cadrados, dividida en tres plantas, que acolle exposicións temporais de fondo calado. Así mesmo, tamén ofrece actividades formativas e de divulgación que fan del un centro en constante transformación e renovación.
Ademais, o museo exhibe de forma permanente na súa planta principal dúas obras plásticas de grande formato de dous referentes da arte galega: Luís Seoane e Urbano Lugrís.
Museo do Pobo Galego
Localizado no antigo convento de Santo Domingos de Bonaval, o Museo do Pobo Galego é unha xanela á rica cultura e tradicións de Galicia. Este museo ofrece una extensa colección que abarca desde traxes tradicionais e ferramentas agrícolas ata embarcacións tradicionais e oficios antigos. Ademais, destaca por contar coa única escaleira triple helicoidal do mundo.
O horario de apertura do museo é de martes a sábado de 11.00 a 18.00 horas e domingos e festivos de 11.00 a 14.00 horas.
Museo Pedagóxico de Galicia (Mupega)
O Museo Pedagóxico de Galicia, inaugurado no 2004, retoma e actualiza un vello proxecto de 1926 que quería fundar un centro museístico galego especializado en materia educativa. O seu obxectivo é preservar materiais educativos, documentos e obxectos relacionados coa ensinanza, dende documentos e fotografías ata libros de texto, materiais didácticos ou mobles escolares.
O centro atópase na rúa de San Lázaro, 107, e o seu horario de apertura, xa encamiñado ao verán, é de luns a venres, de 8.30 a 14.30 horas.
Fundación Eugenio Granell
O museo foi inaugurado en 1995 na Praza do Toural, nun edificio barroco que foi o antigo Pazo de Bendaña. A Fundación Eugenio Granell foi creada para xestionar o museo e garantir a preservación do legado do artista, que inclúe non só as súas obras, senón tamén a súa colección persoal de arte. O museo ten como obxectivo preservar, estudar e divulgar a obra de Granell, pero tamén promover o surrealismo e a arte contemporánea.
O seu horario de apertura de verán é de martes a xoves, de 11.00 a 14.00 horas e de 16.00 a 20.00 horas; os venres, de 11.00 a 14.00 horas e de 17.00 a 20.00 horas; e os sábados de 11.00 a 14.00 horas.
Esta é tan só unha pequena mostra de toda a oferta museística que Compostela ofrece aos seus visitantes para deixarse deleitar pola cultura, arte, tradición e historia de todo o mundo, dende Galicia.