O mes de outubro chega a Compostela coas zapatillas e dorsais como protagonistas absolutas da cidade. Se es afeccionado ao running ou simplemente che gusta o ambiente deportivo e ver pasar as carreiras cunha boa comida esperándote despois, apunta estas dúas citas no teu calendario.
O sábado 10 de outubro, o Circuíto de Carreiras Saudables CorreSan volve ao barrio de San Pedro coa cuarta proba da súa XII edición. É un clásico que achega o deporte popular aos barrios de Santiago, cun ambiente familiar e categorías para todas as idades: os máis pequenos da categoría escolar percorren de 1.250 metros a 2.500 metros, en función da idade, e os adultos, a partir de sub 18, completan os 5 quilómetros. A inscrición para adultos ten un prezo simbólico e os escolares corren de balde. Ademais, quen complete polo menos catro das cinco probas do circuíto entra na clasificación xeral, así que moitos veciños e veciñas do barrio levan meses preparándose para esta cita. Esta será o penúltimo encontro deste conxunto de carreiras, que se despedirá o 14 de novembro na Ruta de Prata por Angrois.
Quince días despois, o domingo 25 de outubro, chega unha das probas máis emblemáticas do atletismo popular da cidade e tamén de Galicia: a 47ª Carreira Pedestre Popular de Santiago. É un percorrido de 12 quilómetros que atravesa as rúas de Compostela, cun ambiente e un apoio do público único que a converten nunha das citas destacadas do calendario deportivo santiagués. A saída está prevista ás 10:00 horas na Avenida de Xoán XXIII, coa inscrición a 10 euros para adultos e 5 euros para nenos, e o prazo permanecerá aberto ata o 18 de outubro ás 23:59 horas ou ata esgotar as prazas dispoñibles. Na edición pasada, o encontro reuniu a máis de 3.820 atletas que descubriron (ou redescubriron) un trazado que é descrito por algúns como o máis bonito do mundo.
Se participas nalgunha destas dúas carreiras ou simplemente vés animar aos corredores, nas Bodeguillas estarémoste esperando con propostas de tempada e produtos de primeira calidade.