Do 28 de maio ao 1 de xuño, Santiago de Compostela engalanarase para recibir unha nova edición da Ascensión, unha das citas máis emblemáticas do calendario cultural da capital galega.
Un dos aspectos chave desta Ascensión 2025 é a accesibilidade e gratituidade. Todas as actividades son de balde e de acceso libre ata completar aforo, salvo contadas excepcións, como o concerto da Real Filharmonía de Galicia no Auditorio de Galicia. Ademais, haberá horarios inclusivos sen ruído nos días 23 e 31 de maio e 1 de xuño, entre as 17:00 e as 19:00 horas, para facilitar a participación de persoas con diversidade sensorial. A inclusión tamén se manifesta na ampla variedade de espazos nos que teñen lugar os eventos, espallando a cultura por toda a cidade, desde a Alameda ata a Praza da Quintana, pasando polas rúas do Franco, o Toural ou Cervantes.
A programación musical destaca pola súa calidade e variedade, que arranca a noite do 28 de maio co Santiago 40 Pop, presentado por Tony Aguilar e con actuacións de artistas recoñecidos como Depol, Adexe & Nau, Ruslana ou Javi Chapela. O día grande da festa, o 29 de maio, remata cun concerto de Tanxugueiras na Praza da Quintana e da Orquestra Marbella na Alameda. Outros nomes relevantes do panorama musical galego que tamén terán presenza nas festas compostelanas son Guadi Galego, Grande Amore, Helena Ejea, Ailá, ou Uxía Lambona e a Banda Molona, mesturando propostas actuais con sons tradicionais.
A música tradicional ten unha presenza transversal durante a celebración. As actuacións de agrupacións folclóricas como Brincadeira, Cantigas e Agarimos, Colexiata do Sar ou Ultreia encherán de son e baile prazas históricas. Estas agrupacións participan tamén en obradoiros abertos ao público, ofrecendo unha oportunidade para aprender e gozar das formas de expresión propias da cultura galega. Tamén destaca a Ruada de Coros o sábado 31, un percorrido coral pola cidade que remata cunha actuación conxunta na Praza das Praterías.
Outro dos grandes atractivos da Ascensión é a tradicional Feira Cabalar, que terá lugar no Mercado Nacional de Gando de Amio. Alí desenvolveranse mostras morfolóxicas de cabalos e bestas de pura raza galega, así como un número de doma clásica, vaqueira e de alta escola, coa participación da Asociación Pura Raza Cabalo Galego.
A programación tamén inclúe teatro con espectáculos como Poncia, protagonizado por Lolita Flores, circo coa compañía Pistacatro, a tradicional Carreira da Ascensión en bicicleta e moita festa na rúa con actividades como os Cantos de Taberna con grupos como Os Estalotes, @s do 8M, Muiñeiros do Sarela ou visitantes como Los Llerones (Asturias) e Vira Badío (Portugal). Tamén haberá espazo para o lecer coa Romaría das Flores, no parque de Belvís, que mestura gastronomía, xogos e concertos ao aire libre, nun ambiente festivo e interxeracional.
A Ascensión 2025 é, en definitiva, unha mostra do mellor de Compostela: cultura popular, vangarda artística, tradición, diversidade, accesibilidade e participación cidadá.