Compostela é coñecida pola historia da súa zona vella e polo ritmo frenético das súas rúas más novas. Porén, a cidade ofrece moreas de recunchos verdes, tranquilos e perfectos para desfrutar dun agradable paseo mentres fuximos, un chisco, do axetreo diario da capital.
Parque da Alameda
É un clásico pero non pode faltar. O parque da Alameda, conformado pola carballeira de Santa Susana, o paseo da ferradura e o paseo da Alameda, é un enclave popular entre visitantes e locais dende o século XIX -aínda que a súa historia remóntase ao século XII, momento no que o arzobispo Xelmírez mandou construír unha igrexa para albergar as reliquias de Santa Susana. E é que non é para menos. Atópase nunha localización privilexiada, colindando cunha parte da cidade histórica, cunha preciosa perspectiva da Catedral e repleta dunha inmensa variedade de árbores e prantas, entre as que destacan os carballos, eucaliptos e os castiñeiros de Indias.
Ademais dunha morea de especies vexetais, a Alameda tamén recibe aos seus visitantes con esculturas como as das Dúas Marías, Valle Inclán ou Rosalía de Castro.
Parque de San Domingos de Bonaval
O parque de San Domingos de Bonaval é unha antiga finca e cemiterio do convento dominico, rehabilitada como parque urbano pola arquitecta galega Isabel Aguirre e o portugués Álvaro Siza no 1994. A este, pódese acceder por un pasadizo que conforman dous museos: o Centro Galego de Arte Contemporánea (CGAC), deseñado polo mesmo arquitecto luso, e o Museo do Pobo Galego.
O espazo atópase a distintos niveis de altura, separados por muros de esquistos, a pedra sobre a cal se asenta a cidade histórica. Diferéncianse tres partes: a inferior, a que pertenceu ao Convento de Bonaval e que dedicaban ao cultivo; a segunda parte, o antigo cemiterio, que hoxe ofrece vistas panorámicas da cidade; e a terceira, unha antiga carballeira na que quedan restos dunha mina e dun lavadeira e, ademais, destaca por ser onde se colocou a primeira antena de radio de Galicia.
Parque de Belvís
Outro espazo verde, outra perspectiva da zona vella de Santiago de Compostela. Ao igual que o anterior, as orixes do parque de Belvís atópanse na vida monástica, neste caso, no convento de clausura de Santa María de Belvís, que se erixiu na ladeira do Monte Viso e se inaugurou no ano 1314. As terras do entorno foron empregadas como hortas e, agora, respetando os muros e vías históricas da zona, atópase o fermoso parque e mirador de Belvís, impoñéndose como unha separación verde fermosa entre o casco antigo, o convento de Belvís e o Seminario Menor.
Parque de Eugenio Granell
Situado no Paxonal e limitando coa zona de Pontepedriña, O Castiñeiriño, Conxo e o Ensache, é un dos parques máis extensos da cidade, alcanzando os 120.000 metros cadrados. O parque de Eugenio Granell inaugurouse fai máis de vinte anos, no 2003, e está dedicado ao músico poeta, pintor e escultor surrealista que lle dá nome, moi vinculado coa cidade.
Conta con zonas axardinadas, espazos de carballos, pequenas pontes, paseos e, todo isto, á beira do río Sar. Ademais, completamente allea ao axetreo da cidade, este mesmo parque alberga a carballeira do Restollal.
Parque de Carlomagno
O barrio das Fontiñas tamén presume de zona verde, sendo outro dos enclaves naturais máis extensos da cidade. No parque de Carlomagno inclúense a zona do parque propiamente dita, situada sobre a cima e con vistas que quitan o alento, e as zonas axardinadas que rodean os edificios.
Pola súa extensión e conexións, o parque de Carlomagno faise ideal para pasear. Este leva directamente ao parque de San Lázaro, polo que, se quedas con fame, non dubides en facer unha parada na Bodeguilla de San Lázaro para repoñer forzas.
Estes son só cinco exemplos pero Compostela ofrece moito máis. As zonas verdes do Campus Sur, a Carballeira de San Lourenzo, o parque de Galeras, o paseo fluvial do río Sarela, o parque da Finca do Espiño, o parque da Granxa do Xesto, Brañas do Sar, o parque do Monte da Almágciga, o parque de Vista Alegre e moito máis. Polo que, se queres coñecer a Compostela máis verde, xa saber por onde comezar.