O primeiro día do mes de San Xoán, a nosa festa meiga, abrirán de novo as portas das nosas Bodeguillas. Casualidade ou coincidencia, estamos seguros de que será unha data case case máxica. Se nolo permitides, imos comparalo a aqueles tres días dos anos 1986, 2005 e 2012 nos que San Roque, San Lázaro e Santa Marta, respectivamente, comezaban a súa andaina. Agora, logo de algo máis de dous meses e medio, o día 1 do mes de xuño será o noso primeiro día con vós neste momento que dan en chamar nova normalidade.
Podedes imaxinar o que sentimos nestes intres. Porque a nosa normalidade eran os almorzos, o xantar e as ceas. As conversas. As horas de traballo incansable. E sobre todo, a nosa normalidade erades vós, clientes convertidos en compañeiros e compañeiras do diario. Saber que nuns días todas esas emocións voltarán fan que nos sintamos inmensamente ledos!
E nesta nova normalidade, haberá algúns cambios. Por exemplo, no que se refire aos horarios de apertura, polo que ademais de pechar os domingos á noite nos nosos tres locais, tampouco abriremos os luns en San Roque, os martes en San Lázaro e os mércores en Santa Marta.
Escanea e accede á nosa carta dixital
Por outra banda e pensando na vosa seguridade, cando nos visitedes atoparedes en tódalas mesas uns códigos QR que vos levarán directamente á nosa carta dixital a través do voso dispositivo móbil. Neste senso, queremos informarvos tamén de que aproveitamos este tempo de peche para cursar as formacións necesarias en materia de prevención da Covid19, adaptándonos así a tódalas normativas que imperan neste momento.
Asimesmo e tendo en conta a adopción de medidas relativas a aforos máximos e distancias de seguridade nos establecementos, recomendámosvos a todos realizar reservas con antelación tanto para comer como para cear. O procedemento é ben sinxelo: únicamente debedes chamarnos e gardarémosvos sitio á hora que nos digades! Finalmente, tamén poderedes facer uso do noso servizo de take away: chamade, escollede os pratos que máis vos apetezan e pasade a recollelos!
Sen máis, grazas por agardarnos.