Santiago de Compostela é unha cidade recoñecida polo seu carácter monumental e espiritual, pero tamén é un lugar cheo de propostas que permiten gozar do verán dun xeito distinto. A calor non sempre é doada de levar pero nesta cidade existen alternativas refrescantes, menos convencionais e con moito encanto. Hoxe propoñémosche unha selección de plans para aproveitar a cidade -e recunchos limítrofes- nos días máis cálidos do ano.
Á sombra dos carballos e das sendas naturais
Se a pedra quente do casco histórico apreta, nada mellor que buscar a sombra en zonas verdes. A Carballeira de Santa Susana, na parte máis alta da Alameda, é un dos espazos máis emblemáticos para gozar dun paseo ou para estomballarse á fresca. Pola súa banda, o Parque de Belvís ofrece unha panorámica distinta da cidade, con ampla zona verde onde descansar.
Para quen queira ir un pouco máis alá, atópanse percorridos como os que beben dos ríos de Compostela, o Sar e o Sarela que, seguindo as súas sendas, podemos descubrir a cara máis tranquila e silenciosa da cidade.
O oasis dos museos
A cidade conta con numerosas propostas culturais. Entre elas pódese citar o Museo do Pobo Galego, no antigo convento de San Domingos de Bonaval, que é unha visita obrigada para quen queira comprender mellor a identidade e tradicións galegas. Ademais, a súa escaleira helicoidal non deixará a ninguén indiferente. O CGAC (Centro Galego de Arte Contemporánea), situado moi preto do anterior, ofrece exposicións actuais e sorprendentes, nun edificio de deseño moderno asinado polo arquitecto Álvaro Siza. Ou a Fundación Eugenio Granell, na Praza do Toural, que abre as portas ao surrealisto e arte vangardista.
Zonas fluviais a poucos quilómetros da cidade
Se, pola contra, prefires propostas nas que te poidas somerxer, nos arredores de Compostela e a menos de media hora en coche, hai espazos fluviais dos que desfrutar. Así, por exemplo, atópase a área recreativa de Chaián (Trazo), situada nas beiras do río Tambre, conta con zona de baño, mesas, barbacoas e moito espazo verde para pasar o día en familia ou con amigos. Tamén nas orelas do mesmo río, atópase a praia fluvial de Tapia (en Ames). Esta zona recreativa, cunha extensión de arredor de 15.000 metros cadrados, atópase a arredor de 15 quilómetros de Compostela. Xa no río Ulla, A Praíña (entre os municipios de Teo e A Estrada) é unha proposta de ocio ideal para quen queira desfrutar dun agradable baño, pequenas rutas ou mesmo paseos en caiac.
E, por suposto, non podemos esquecer que o verán tamén se goza a través do padal. Este verán, nas Bodeguillas de Santa Marta e San Lázaro poderás desfrutar de propostas frescas, saborosas e de gran calidade.