Se es deses intrépidos aos que lles gustaría facer o Camiño de Santiago pero a preguiza pode contigo, a plataforma Google Arts & Culture vén de publicar o proxecto ¡Buen Camino!, no que coñecer a natureza, cultura, gastronomía e xentes do camiño é posible sen nin sequera abandonar a comodidade do noso sofá. Anoa as botas porque aquí che explicamos en que consiste!
Google Arts & Culture é unha iniciativa sen ánimo de lucro que traballa con institucións culturais e artistas de todo o mundo para preservar e achegar a arte e cultura do mundo á esfera dixital, de maneira que sexa accesible para todos, en calquera lugar. É así que, coa colaboración da Xunta de Galicia, o Goberno de Aragón, o Goberno de España e outras entidades como a Fundación Catedral de Santiago ou a Federación Española de Asociacións de Amigos do Camiño de Santiago, publicou ¡Buen Camino!, una ruta online e audiovisual polos puntos máis emblemáticos da rede de Camiños de Santiago de Compostela.
O proxecto chega a ser unha verdadeira galería de arte para todo o mundo (conta con once idiomas!) con 108 exposicións, 7.750 fotografías e vídeos e 15 visitas virtuais de 360º a lugares como a Catedral, a Torre de Hércules, o conxunto etnográfico do Cebreiro ou a Catedral de Ourense. En resumo, que nos mostra?
- Introdución. A ruta audiovisual comeza cunha peza musical e un mapa ilustrado de Miguel Ángel Camprubí.
- Pequeno índice. Este índice permítenos explorar a natureza, cultura, comunidade (persoas, gastronomía e música) e ofrece unha guía para principiantes.
- As rutas. Un percorrido fotográfico polos Camiños de Fisterra e Muxía, do Inverno, o Portugués e o Portugués pola costa, o Francés, o Inglés o do Norte, Primitivo, a Vía da Prata e a Ruta do Mar de Arousa e Río Ulla.
- Percorrido polos sentidos. Nesta sección podemos somerxernos de cheo, cos sons, imaxes, curiosidades e coñecendo as persoas que traballan ao longo dos quilómetros que compoñen o camiño.
- Outros. Un percorrido histórico polos puntos chave, reportaxes sobre a accesibilidade dun camiño para todos, máis imaxes da fermosa natureza, a xente, a música e moitos plans dos que desfrutar unha vez chegados á capital galega.
É unha experiencia dixital que serve para confirmar e reafirmar a beleza do Camiño de Santiago e, sen dúbida, animarnos a emprender a aventura de facelo. Aínda non te decidiches a botarlle unha ollada? Pincha aquí!