O día 28 de xuño celébrase o Día Internacional do Orgullo LGTBI e a cidade celebra unha nova edición de Compostela Diversa. Dende a Bodeguilla de Santa Marta e a Bodeguilla de San Lázaro sumámonos á iniciativa para encamiñarnos cara a consecución dos dereitos, visiblidade e normalización da vida do colectivo.
Ademais do apoio de máis de douscentos establecementos comerciais e hostaleiros vestíndonos coas cores da Compostela máis diversa, ca fin de darlle visibilidade aos valores da iniciativa, ata o próximo 30 de xuño, algúns espazos públicos moi populares están a ser iluminadores e decorados con motivos desta data. Trátase, por exemplo, da oficina de Turismo de Santiago, distintos puntos da Alameda como o Palco da Música ou a escultura das Marías, Porta Faxeira, o Eucalipto dos Namorados ou a Praza Roxa. Os xogos de luces poderán verse a partir do atardecer e até a madrugada.
O eixe central de Compostela Diversa é a visibilidade e a loita polos dereitos de todos os membros do colectivo LGTBI polo que se recollerán unha serie de accións e actividades entre as que destacan os faladoiros baixo o título “Demandas de asilo de persoas LGTBI” ou a proxección de filmes como “Testigos de un tiempo maldito”, co coloquio posterior con Daniela Fernández e Javier Larrauri, ou “Habitar” de Anxos Fazáns.
Por outra banda, a música tamén é unha das grandes protagonistas de Compostela Diversa, que se organizará na praza de Mazarelos o próximo sábado 29 de xuño. Nesta data poderá desfrutarse da música de artistas como Nuria Vil, Zeltia Irevire, Pava, Lingua Franca ou DJ Nenaza.
Nós xa estamos preparados para celebrar a diversidade de Compostela e agardamos que nos acompañades neste mes (e sempre).