Agora que o período estival xa chegou, apetécenos saborear opcións máis frescas e lixeiras para sobrevivir ás altas temperaturas que están por vir. Por iso, traémosvos varias suxestións para darlle inicio ao verán con moito sabor.
En primeiro lugar, queixo, embutidos ou xamón. Na nosa humilde opinión, a unha comida fáltalle sabor se non ten ningún compoñente desta tríada. Por sorte, nas nosas Bodeguillas temos variedade de queixos galegos artesáns (coma o do Cebreiro, Arzúa Ulloa, San Simón, Lara&Sara, Touza Vella ou o Rexo) e tamén diferentes tipos de manchego, queixo de cabra, Cabrales, Idiazábal e Torta del Casar. Ademais, non hai dous sen tres e as táboas de embutidos ibéricos ou calquera dos xamóns que temos dispoñibles, son un acerto seguro.
Despois deste primeiro entrante, que mellor que un prato cheo de cor? As ensaladas non son aburridas e senón que llo digan a calquera das nosas ofertas: ensalada Bodeguilla; de crocante de polo e mango; de queixo con noces e pasas; de queixo de cabra con cebola caramelizada; de bacallau, gulas, picatostes e tomate confitado; de queixos, noces e crema de marmelo; ou, para os máis lambóns, de vieiras, gambas, queixo relado e vinegreta de piñóns con mazá.
Aínda que se es dos que ten fame a todas horas, temos tixolas que de seguro van satisfacer o teu apetito feroz. Por exemplo, unha das nosas últimas estrelas é a de arroz negro e a de arroz con rape e lagostinos nunca defrauda. Sen embargo, se prefires algo diferente ao arroz, temos outras como a popular tixola de polbo con lagostinos ou a de ovos campeiros, xamón ibérico e queixo gratinado.
Como colofón final, a sobremesa. A nós, persoalmente, encántannos os coulants de chocolate, o tiramisú con castañas ou o flan de caramelo, aínda que os xeados de queixo con marmelo ou o sorbete de limón non teñen nada que envexarlle. Ademais, podedes acompañar calquera destes doces cun viño de sobremesa. A nosa carta inclúe moscateis, Pedro Xelmírez, do Porto e outros viños doces. Descúbreos todos na nosa carta online!
