Este xoves 15 comeza unha nova entrega de Santiago(é)Tapas, unha das xornadas máis agardadas polos larpeiros e larpeiras que visitan Compostela para saboreala a pequenos bocados. O certame, que chega á súa décimo quinta edición, estenderase até o 3 de marzo, e aqueles que se decidan a realizar algunha das súas rutas, poderán votar a mellor tapa de Santiago entre as máis de sesenta propostas.
Compostela busca a mellor tapa e esta pódese atopar nos 41 establecementos participantes distribuídos en cinco (é)tapas diferentes. Así, atopámonos co Camiño Inglés, o Camiño Francés, o Camiño Portugués, a Vía da Prata e o Camiño do Norte.
Como rutas adicionais, para usuarios e usuarias con celiaquía, vexetarianos ou moi larpeiros, tamén poderán desfrutar da ruta vexetariana, da ruta sen glute e da ruta doce.
A nós poderás atoparnos no Camiño Francés coa tapa tradicional de rolo de cachena con queixo de Arzúa-Ulloa e redución de mencía da Bodeguilla de San Lázaro. E, no Camiño Portugués, coa Bodeguilla de Santa Marta e o donut de carrilleira ao mencía. Recomendámosche que te deixes aconsellar por nós para maridar ambas tapas con viño.
Do mesmo modo que un peregrino, o amante das tapas poderá ir selando en cada establecemento o seu Tapasporte. Este documento poderá ser adquirido nos establecementos participantes, na Oficina de Turismo de Santiago, na rúa do Vilar, ou na sede da Asociación Hostelería Compostela na rúa das Salvadas.
Poderás puntuar a tapa a través do código QR que che entregaremos en cada establecemento e, ademais, non esquezas de pedirnos que che selemos o Tapasporte xa que, se completas, cando menos, unha das rutas marcadas no Santiago(é)Tapas poderás optar a premios tan variados como abonos para acudir a un partido do Obradoiro, produtos gastronómicos, ceas, experiencia, viños, bonos de adestramento para o ximnasio Curves, abonos dobres para o Recorda Fest e moito, moito máis.
Agardámoste coas nosas tapas do 15 de febreiro ao 3 de marzo, de 13:15 a 15:00 horas e de 20:15 a 22:45 horas.